BAGUIO CITY – Mangipatpatungpal ita iti hot pursuit operation dagiti otoridad para iti pakabigbigan ken panakatiliw ti suspek a maatap a nangdukot iti maysa a menor de edad a lalaki sadiay Purok 7 New Tanglag, Tabuk City idi rabii, Setyembre 6.
Ti biktima ket agtawen iti 11-anyos ken residente iti nasao metlaeng a lugar.
Iti inisyal a report ti Tabuk City Police Station, nagturong ti biktima iti banyo nga adda iti ruar ti balayda.
Nupay kasta, adda ti naka-gloves ken attidog ti buokna a lalaki a nang-apput (cover) iti ngiwat ti biktima.
Pwersado nga inala ti suspek ti biktima ken inturongna iti bantay.
Nagturong met ti nagannak ti biktima iti banyo tapno apanda kitaen daytoy gaputa saanda a mauray.
Nupay kasta, saanda a nadanonan ti biktima iti banyo rason a kiniddawda ti tulong dagiti barangay officials ken naiyawag a dagus kadagiti otoridad tapno sapulenda ti biktima.
Kabayatan ti panagsapsapul dagitoy, adda ti nangngeg ti maysa a maseknan nga umili a putok ti paltog iti saan nga ammo a direksyon.
Mamati a daytoy ti rason iti panakaalarma ti suspek ken nawaya-wayaanna ti biktima.
Dagus met a timmaray ti biktima agingga a nasabatna dagiti mangsapsapul kenkuana.
Nagsagrap ti biktima iti gasgas ken sugat partikular iti imana gapu iti panakaigalut daytoy.
Naiturong ti biktima iti Kalinga Provincial Hospital para iti panakatamingna.
