BAGUIO CITY – Sumangsango itan iti kaso a Frustrated Murder ken panaglabsing iti Anti-Violence Against Women and their Children Act of 2004 ti baro a nangbagbagsol iti dua nga estudyante a babae sadiay Barangay Hall ti Baayan, Tublay, Benguet itay nabiit.
Biktima iti insidente da Dina Bantow Marquez kenni Mae Ann Bassit Alfredo, agpada nga 18-anyos, balasang, estudyante, tubo ken residente ti Baayan, Tublay, Benguet ken agpada a nakadeploy kas student assistant iti nasao nga ospital.
Nabigbig met ti suspek a ni Anthony Tolentino Almas, 21-anyos, baro ken residente ti Tublay, Benguet.
Maibasar iti imbestigasyon ti pulisya, agbuybuya dagiti dua a biktima iti kusina ti pagtatrabahoanda a barangay hall idi kilaat nga immuneg ti suspek.
Dinamag dagiti biktima no apay a sinumrek ni Almas ngem kilaat a dinangranna ti moging ni Alfredo ken binagsolna ti tiyan ni Marquez babaen iti boneng ket dagus a naglibas daytoy.
Dagus met a nagresponde dagiti otoridad a nagresulta iti panakaitaray dagiti biktima ken panakaarestar ti suspek no sadinno narekober kenkuana ti boneng nga inaramatna iti insidente.
Kabayatan met ti manhunt operation, nadlaw dagiti otoridad a nagsagrap ti suspek ti sugat iti ima ken tiyan daytoy isu’t gapuna a naiturong iti Benguet General Hospital.
Iti agdama, manarimaan paylaeng ti panagpatamming ti suspek ken dagiti biktima.
Agkidkiddaw met iti tulong pinanansial ti pamilya ni Marquez para iti panakataming daytoy kalpasan a nakaro a nadangran iti insidente.
