Saan a nasarakan ti Senate Office of Sergeant-at-Arms (OSAA) team ken dagiti pulis ni suspended Bamban, Tarlac Mayor Alice Guo kasta met dagiti kakabsat daytoy idi kalman kalpasan ti panakairuar ti arrest order dagitoy gapu iti saanda a panag-atendar kadagiti senate hearing a maipatpatungpal.
Maibasar iti report awan ti nasao a mayor iti pagtaenganna idiay Bamban, Tarlac bayat a kinuna ti caretaker ni Guo a saan daytoy a nagaw-awiden.
Saan met a napalubusan dagiti arresting team a sumrek iti paktorya dagiti kabsat ni Guo a da Siemen ken Sheila Leal Guo idiay Valenzuela City.
Kabayatanna, impakaamo ni Senate President Francis “Chiz” Escudero a saan met laeng a nasarakan ti Senate Sergeant-at-Arms da Roberto Ancan, Wesley Leal Guo ken Dennis Cunanan.
Nu pay kasta, imapasigurado ni Cunanan a makipaset daytoy iti sumaruno a hearing iti Senado.
Immuna met naarestar ni Nancy Gamo, ti accountant ni suspended mayor Guo nu sadino dimmalan daytoy iti medical check-up ken naiturong iti Senado idiay Pasay City nga isu’t pag-iyananna sakbay a maituloy ti hearing maipapan iti naraid a Philippine Offshore Gaming Operators (POGO) idiay Bamban.
