Kinuwestionar ni suspended Bamban, Tarlac Mayor Alice Guo da Senator Risa Hontiveros ken Senator Sherwin Gatchalian nu daytoy kadi ti kadakellan a parikut ti pagilian nu apay nga ti atensyon ket nakapokus la unay kenkuana wenno wagas daytoy tapno iparangda laeng ni Guo kas antagonist wenno kontrabida.
Sigun kenni Guo idi kalman, sisasagana daytoy a mangsango kadagiti alegasyon kontra kenkuana iti patas a laban ken umno a forum.
Kinuwestionar pay ni Guo nga apay a saan a tutukan da Hontiveros ken Gatchalian dagiti daduma a pakaseknan iti pagilian kas iti panagbisin ken kinakurang ti healthcare imbes a ti kanayun a panangipaay iti pangta kenkuana babaen ti warrant of arrest.
Inyunay-unay pay ni Guo a saanna kayat a mausar daytoy para iti panakasayaat ti political ambitions dagiti politiko.
Maipalagip a ni Guo ket nasuspindir iti posisyonna gapu iti maatap a koneksyonna kadagiti iligal nga aktibidad iti naraid a Philippine Offshore Gaming Operator (POGO) idiay Bamban, Tarlac.
Makukuwestionar met laeng daytoy gapu iti saan nga agtutunos a sungbatna maipapan iti nationalidad ken kabibiyagna.
Idi napalabas, nairuar ti arrest order kenni Guo ken ti daduma a kakadua daytoy gapu iti saanda a panagparang iti senado.
Nu pay kasta, kinuna ni Guo a saan daytoy a nakaatendar gapu ta nakapasar daytoy iti trauma kadagiti napalpalabas a hearing.
Iti sabali a bangir, pinaglibakan ni Guo nga adda kainaiganna maipapan iti pangta iti biyag a maaw-awat ni Senator Gatchalian agsipud ta pati daytoy ket makaaw-awat iti pangta.
