BAGUIO CITY – Nakemmeg ti tallo a drug personality ditoy rehiyon Cordillera kasaruno iti nagsisina a buybust operation nga impatungpal dagiti otoridad
Maibasar iti report, nakemmeg ti maysa a vendor ken maibilbilang kas High Value Individual iti iligal a droga iti naisayangkat a buybust operation sadiay Piripin Bato, Pico, La Trinidad Benguet
Nabigbig daytoy a ni Joemamel Valera Dipatuan alyas Alvin, 37- anyos, naasawaan, tubo ti Lagayan Abra ken residente ti Dreamland, Pico La Trinidad.
Naamuan a nangilako ti suspek iti tallo a pakete ti shabu nga agdagsen iti 0.52 grams ken aggatad iti P3,536
Sigun pay iti pulisya, immuna a naibalod ti suspek iti maysa a tawen ken uppat a bulan kasaruno iti pannakakemmegna gapu metlaeng iti panangilakona iti iligal a droga iti operasyon nga insayangkat ti Baguio City Police Office Station 2 ngem temporaryo a nawaya-wayaan babaen iti plea bargaining.
Kabayatanna, nakemmeg pay ti maysa a parlor owner iti buybust operation sadiay Brgy. Imelda, Pudtol Apayao
Nabigbig daytoy a ni John Ariam Paul Magramo Magro, 28 anyos, ken residente ti Brgy. Imelda, Pudtol, Apayao
Maibasar iti report, nakumpiskar manipod ken Magro ti maysa a pakete ti mapapati a shabu nga agdagsen iti .14 grams ken aggatad iti P1,000 pakairamanan ti buybust money, ken selpon a naaramat iti transaksyon
Iti sabali pay nga operasyon, nakemmeg ti maysa a High Value individual iti iligal a droga sadiay Alfonso Tabora, Baguio City
Nabigbig daytoy a ni Ibalzon Cadangen, 37 anyos, ken residente ti Alfonso Tabora, Baguio City
Maibasar iti report, naala kenkuana ti maysa a pakete ti mapapati a shabu nga agdagsen iti 0.79 grams nga addaan iti Standard Drug Price a 5, 372
Malaksid iti dayta, nakumpiskar kenkuana ti kanayunan a maysa a pakete ti mapapati a shabu nga agdagsen iti 0.74 grams nga aggatad iti 5, 032 pakairamanan ti boodle money, cellphone ken lugan a naaramat iti transaksyon
Iti agdama, adda ita iti kustudiya dagiti otoridad dagiti nakemmeg a suspek ken sumangsango iti kaso a pananglabsing iti RA 9165 wenno Comprehensive Dangerous Drugs Act of 2002.
