Impablaak ti Bureau of Immigration a pinaikkatda ti tallo a personnel dagitoy gapu iti mapapati a panagtulongda iti maysa a balud a Korean a naglibas manipod iti panagbantayda.
Sigun iti pannakangiwat ti Bureau of Immigration a ni Dana Sandoval, inkuyog dagiti 3 personnel ti Korean fugitive iti panagdinggeg iti opisina ti piskal ti Quezon City idi Marso 4.
Kalpasan ti panagdinggeg, impadamagda a mapukpukaw ti Korean fugitive kalpasan a nagkiddaw daytoy ti pammalubos nga agturong iti comfort room wenno c.r.
Ngem maibasar iti CCTV footage a nagun-od ti nasao nga ahensia, maimatangan dagiti tallo nga immigration personnel a pimmanaw iti Quezon City Hall a kaduana ti Korean fugitive a nakalugan iti BI van.
Naimatangan ti van a nagsardeng iti Scout Chuatoco Street, ken nakita ti Korean nga awit-awitna ti bag nga awan ti posasna, naka-shorts, ken sinurot dagiti tallo nga Immigration personnel.
Iti sabali pay a video, nakita ti Korean a naglugan iti van sakbay a pimmanaw.
Gapu iti napasamak, imbilin ni BI commissioner Joel Viado ti pannakaikkat dagiti dua nga Immigration contractual employee ken pannakaipila ti administrative ken criminal charges kontra iti regular nga empleado.
