Napasamak ti tallo a vehicular traffic accidents kadagiti nagduduma a paset iti siudad ti Baguio bayat ti umuna nga aldaw ti Hunyo iti agdama a tawen.
Immuna a naipakaammo a napasamak ti umuna nga insidente sadiay Leonard Wood Road a nakairamanan ti van iti 3:50 itay parbangon.
Nagresulta daytoy iti pannakadangran ti driver daytoy.
Dagus met a nagresponde ditoy dagiti personnel ti Baguio City Police Office Station 3 ken ti Baguio City Emergency Medical Service (BCEMS).
Kabayatanna, nailista met ti maikadua a vehicular traffic accident sadiay Legarda Road iti 4:08 iti parbangon iti metlaeng kapada nga aldaw.
Nagresulta met daytoy iti damage to properties with physical injuries a nakairamanan ti motorsiklo ken ti maysa a Toyota Innova.
Malaksid iti dayta, nailista pay ti maikatallo nga aksidente iti 4:30 iti metlaeng parbangon iti kapada nga aldaw sadiay Loakan Road a nagresulta iti pannakadangran ti driver.
Gapu iti dayta, nagpalagip manen dagiti otoridad kadagiti motorista nga agridam ken agannad a kanayon.
