Dumanonen iti 145% ti impataw ni US President Donald Trump a taripa manipud kadagiti export product manipud China.
Daytoy ket kalpasan nga impangato met ti China ti taripa nga impataw daytoy manipud kadagiti produkto nga agtaud sadiay Estados Unidos.
Iti panakiuman ti Bombo Radyo kenni Jun Delfrado Villanueva Jr., Bombo International News Correspondent manipud Estados Unidos, kinunana a nagbinbinnales ti pagilian nga Estados Unidos ken China iti panagpangatoda iti taripa iti tunggal maysa.
Sigun kenni Villanueva Jr., immuna nga inwaragawag ti Estados Unidos ti panakaipatungpal ti 10% a baseline a taripa ngem para kadagiti daduma a pagilian ket nangatngato kas iti China a dimmanon iti 37% idi damo.
Nupay kasta, bimmales ti China ken impangatona met ti taripa manipud kadagiti produkto ti Estados Unidos agingga a nagsinsinukat dagitoy a nagpinangato iti taripa.
Sigun kenni Villanueva Jr., dagiti rason no apay a nangipataw ni US President Trump iti taripa iti sangalubongan ket para iti panakasolusyon ti mapaspasamak a “budget deficit” iti nasao a pagilian.
Malaksid iti dayta ket gapu iti mapaspasamak nga imbalance iti exportation no sadino dakkel ti mapaspastrekan dagiti daduma a pagilian no idilig iti Estados Unidos nangruna iti pagilian a China.
Innayon ni Villanueva Jr. a gapu iti dakkel a taripa a naipataw sadiay China ket impablaak met ti China ti panangipataw dagitoy kadagiti hollywood movies a sumrek wenno maipabuya iti pagilian daytoy.
Kabayatanna, impeksa ni Villanueva Jr. a saan a mailibak a ni US President Trump ti mangdikdikta iti ekonomiya ti sangalubongan nupay kasta, ti mas maap-apektaran iti daytoy ket dagiti consumer gapu ta dagitoy ti agbaybayad iti tax.
