Nakemmeg ti 28-anyos a tatang babaen kadagiti otoridad idiay Quezon City kalpasan a ginandatna nga ilako iti online ti maladaga nga anakna nga agtawen laeng ti 11 a bulan
Sigun iti report, inaramat ti lalaki ti maladaga kas “human shield” idi nangipatungpal dagiti kameng ti National Bureau of Investigation-Special Task Force (NBI-STF) iti entrapment operation.
Naduktalan dagiti kameng ti NBI-STF nga ilaklako ti lalaki ti maladaga nga anakna iti maysa nga online post.
Sigun kenni NBI-STF agent Lolibeth Jane Calisi, inkabil ti suspek ti P55,000 a tag price iti anakna.
Iti panagimbestigar dagiti otoridad, ginandat ti suspek nga ilako ti anakna kas pammales iti panagkedked ti sigud a nobiana nga agkaduada manen.
Dagos met a naispal ti maladaga ken naipaay iti Department of Social Welfare and Development para iti panangaywan wenno panangtaripato iti daytoy.
Ti met suspek a tatang ti biktima ket nagkedked nga agkomento ken posible a maipasango iti reklamo a “child trafficking” ken “resistance and disobedience to a person in authority.”
