LA TRINIDAD, BENGUET – Naireklamo ti maysa a taxi driver gapu iti maatap a panangtakawna iti tallo a kalding a taraken ti retired police officer idiay La Trinidad, Benguet itay laeng nabiit.
Ti suspek ket addaan iti legal nga edad ken residente ti Kapangan, Benguet.
Ti met biktima ket 59-anyos ken agnanaed residente ti La Trinidad, Benguet.
Maibasar iti blotter ti pulisya, sinererek ti suspek ti goat shed ken tinakawna dagiti tallo a kalding a taraken ti retired police officer.
Dagiti kalding ket inlako ti suspek iti maysa a livestock trader iti slaughterhouse iti siyudad ti Baguio.
Naammoan met nga inlako ti livestock trader dagiti kalding iti maysa a restaurant owner idiay Atok, Benguet.
Maibasar iti report ti pulisya, nairana met a napan ti biktima iti restaurant idiay Atok ket ditoy a nabigbigna wenno nailasinna ti tarakenna a kalding.
Nupay kasta, maysa laengen a kalding ti narekober ti akinkukua.
Gapu met iti ladawan nga inala ti buyer ket nabigbig ti kinasiasino ti suspek.//Bombo Genzel Depayso
