BAGUIO CITY-Agsubli iti Octagon ti pito a Team Lakay Fighters para iti One Championship events intun Nobiembre ken Disiembre iti agdama a tawen.
Iti panakiyuman ti Bombo Radyo kenni Coach Mark Sangiao, saan da a ninamnama ti kinaadu dagiti fighters ti Team Lakay a mainayun iti Singapore ken Metro Manila fight card ken adda ti posibilidad na a manayunan pay dagitoy.
Impannakel ti multi titled coach ti napintas a kondisyon dagiti Cordilleran fighters agsipud ta regular a maipaspasidong dagitoy iti training ken conditioning uray awan ti naituding a laban da.
Innayon pay ti Team Lakay founder nga excited wenno magagaran dan nga ibagi ti Pilipinas iti kadakkelan a Mixed Martial Arts promotions iti Asya.
Umuna a naikeddeng a lumaban ni Stephen Loman kontra kenni sigud a Bantamweight Champion Bibiano Fernandes intun Nov. 19 idiay Singapore Indoor Stadium.
Mairaman iti undercard ditoy ni dati a Bantamweight Champion Kevin “The Silencer” Belingon kontra kenni Jae Woong ti South Korea.
Dakkel a karit para iti ranked # 4 a ni Loman ti nasao a laban agsipud ta ti managabak ditoy ket maipaayan gundaway para iti bakante a One Bantanweight belt.
Kabayatan na, uppat pay Cordilleran fighters ti mabuya iti undercard iti panagsango da reigning Strawweight champion Joshua Pacio kontra kenniJared Brooks intun Desiembre 3, 2022 idiay MOA Arena.
Maimatangan iti panagsubli iti One ni sigud a One Featherweight Champion Geje “The Gravity” Eustaquio kontra kenni Hu Yong ti China.
Kabayatan na, agsango iti Atomweight division da Jenelyn “The Graceful” Olsim kontra kenni Meng Bo ti China.
Panggep met a sumubbot iti pannaka-abak na ni Jeremy”The Juggernaut” Pacatiw iti naudi a laban na nu sadino makabalubal na ni Tial “The Dragon Leg” Thang iti Bantamweight division.
Iti agdama ket mabirbirukan ti kalaban ni Flyweight contender Danny “The King” Kingad kalpasan nga immatras ni Gurdarshan Mangat gapu iti injury. jtb
