“Saanko a napadasan nga ag-iggem ti kwarta idi agis-eskwelaak. Nu agawidak, awan pagpletek. Ultimo sapatos nga usarek iti pagadalan ket bulodek. Dandani saannak pay nga agturpos gapu ta awan paggatang ti uniporme ken proyekto. Iti kinapudnona, saanko pay a napadasan a nangan iti restaurant. Saba laeng ti kankanen mi ket umdasen. Ngem gapu iti tulong ti apo ket nalasatak amin dagitoy a pannubok agingga a nagun-od ko ti agdama nga estado ti biagko.”
Sakbay a nagun-odna ti agdama a posisyonna kas Police Lieutenant Colonel ken Assistant Chief ti Regional Police Community Affairs and Development Unit (RPCADU) – Cordillera, ado pay dagiti pannubok a napasaran ni Denver Adonis Alidao.
Ni Alidao ket naiyanak idi Disyembre 31, 1973 idiay Kabayan, Benguet babaen kadagiti nagannakna a daydi Mr. Sabino Domingo Alidao ken Mrs. Natividad Adonis Alidao. Sangapuloda nga agkakabsat ken isuna ti maikapito.
Iti interview ti Bombo Radyo kenni Alidao, kinunana a maibilang ti pamilyada kadagiti maaw-awagan iti “poorest of the poor.”
“Ni Tatang ko ket maysa a pastor. Awan met iti sweldona. Small time carpenter at the same time, agfarmer met, both of my parents. Awan ti daga mi, awan ti kinelleng a mataltalon isunga bulbuloden mi laeng diay taltalonen mi. Nu mamingsan ket saba laeng ti kankanen mi gapu ta awan ti inapoy.“
Ni Alidao ket nag-eskwela iti elementarya iti Kabayan Elementary School ken nagturpos iti sekondarya iti Kamura National High School idiay Kabayan, Benguet idi 1992.
Idi elementarya daytoy ket aktibo ken participative rason a maysa daytoy kadagiti honor students.
“Uray awan unay ti bitamina dagiti kankanen mi idi ket adda ti honor ko idi elementary ak“.
Idi met sekondarya daytoy, napan ti pamilyana iti siudad ti Baguio. Iti daydi a panawen ket masakit metten ti inana. Ni lolana laeng ti kadwana a nabati iti balayda idiay Kabayan, Benguet.
Ditoy a napukawan iti ganas nga ag-eskwela gapu ta malaksid iti kinakurang ti financial support ket awan pay ti pagdawatanna iti moral support.
“Dandani saannak a makagraduar idi high school ak, saan a gapu iti kinatabbed ngem awan ti moral support kasi awanda amin, ni lolak lang ti adda idiay. Adda diay time a saannak a mangan iti bigat.”
Imbinglay pay ni Alidao a saanna a napadpadasan a makaiggem ti kwarta nga agtaud kadagiti nagannak nu apan iti pagadalanda.
“Saan ko a napadpadasan nga apan iti eskwelaan nga adda kwartana nga ited ti parents, uray piso.” “Nu adda man ket dua peso, umanay a panggatang ko ti ice candy ken pancake nga isu laeng ti kanek, ngem inrigatak, inkomboyak.”
Iti baet daytoy, nagtuloy latta ni Alidao a nagadal iti kolehiyo iti University of Baguio iti kurso a Bachelor of Science in Criminology.
Ditoy a napadasanna ti magmagna manipud Victoria Village agingga iti University of Baguio ken kanayonan pay a marabian nga agawid gapu ta awan pagpletena.
“Uray nagcollege ak, saanko a napadpadasan a makaiggem ti dakkel a kwarta, 5 pesos is enough, mapan from Victoria Village going to University of Baguio. Adda lang 5 pesos ko a pagpletek, mayaten, ta 1.50 ti plete iti student idi ken 1.75 iti regular.”
Napadasanna a mabagsak gapu ta awan panggatangna kadagiti dokumento, uniporme ken dadduma pay a kasapulan iti pagadalanda.
“Idi college ak, awan honor ko, ngem adda diay time nga nangangato ti grades ko. Nu nagaget ak nga agreview ket aggrade ak met ti 98. Actually, napadasak ti mabagsak. Saan manen a gapu iti kinatabbed ngem gapu ta awan ti mausar mi. Kasi diay activities gamin iti eskwelaan, agxerox ket awan pagxerox ko isunga kanayon a madisdismayaak. Awan ti maigatang ti uniform isunga remedyo amin.”
Tunggal madanon ti eksaminasyon ket kanayon pay nga ag-promisory note ni Alidao tapno laeng maka-exam gapu iti parikut iti pinansiyal.
Iti baet ti kinakurang ti pinansiyal, balligi met a naipalpas ni Alidao ti kursona iti nasurok uppat a tawen babaen iti tulong dagiti kakabsatna ken ti panagserbina kas working student.
“Naipalpas ko ti kursok, 4 and a half years gapu ta working student ak. Basta summer, agbirukak ti pagtrabahoak isunga atleast adda pag-enroll during enrollment ken nagtitinnulong kami gamin nga agkakabsat.”
Malaksid kenni Alidao, nagturpos metlaeng dagiti walo a kakabsatna iti kolehiyo bayat a dagiti dua a kabsatna ket nakaturpos met iti vocational.
“Nagtitinnulong kami gamin nga agkakabsat that’s why we were able to finish our studies. Ngem babaen metlaeng iti tulong ti apo ket nakapaggraduar kami nga walo. Diay dua nga kabsat mi adda met ti nalpasda, vocational. We are all working, many of us are working in the government, maymaysak lang nga napan iti uniform service.”
Nagturpos ni Alidao iti University of Baguio iti kurso a Bachelor of Science in Criminology idi 1996.
Balligi met daytoy a nagtrabaho kas pulis idi 1997 agingga a ngimmato a ngimmato ti posisyonna nga iti agdama ket maawagan isuna kas PLTCOL. Denver A. Alidao, Assistant Chief of the Regional Police Community Affairs and Development Unit (RPCADU), Cordillera.
Saan a pulos nga impagarup ni Alidao a ti pamilya a laslasoyen dagiti tattao idi ket tangtangadenda iti agdama.
“Kanayon dakami nga lasolasoyen idi gapu iti kinapobre, itatta, they look up to us because almost amin kami nga agkakabsat ket nakagraduar ti studies.”
Impeksa ni Alidao a dakkel ti nagdumaan ti biagna ita ken idi kaubingna.
Ita ket magatangna dagiti kayatna a kanen ken usaren. Mapananna dagiti lugar a kayatna a pasyaren ken mapadasanna a mangan kadagiti restaurant a pulos a saanna idi a napadpadasan.
“I have all the basic needs. Makapannak met iti kayat ko a papanan. Kayat ko a gumatang ti second hand a lugan, mabalin met nga maiurnongan. Idi ket pagpletek awan, sapatos, awan, but now maibagak nga God provided everything.”
Isagsagot met ni Alidao dagiti amin a nagun-odna iti biagna kadagiti nagannak uray awandan iti rabaw ti daga.
“Because of them, I was here in this world and achieved something.”
Nangipaay met ni Alidao ti mensahe kadagiti makapaspasar iti kinarigat ti biag nga itultuloyda latta nga ag-eskwela ken agdawatda ti tulong iti namarsua.
Para met kadagiti pamilya nga adda kabaelanna, impeksana a saanda a sayangen ti oportunidad a makapag-eskwela gapu ta pagsaayatanda metlaeng daytoy.
Ni Alidao ket madama nga agnanaed idiay Irisan, Baguio City, addaan daytoy ti maysa nga anak a babai ken agserserbi metlaeng daytoy kas pastor.
Ti istorya ni Alidao ket maysa manen a mampaneknek a saan a tubeng ti kinarigat ti biag iti pananggun-od iti arapaap iti biag.
Watch the full interview of Bombo Radyo to PLTCOL. Denver A. Alidao: https://www.facebook.com/BomboBaguioOfficial/videos/843367024305954
