Balligi ti panangkemeg ti La Trinidad Municipal Police Station (LTMPS) ti No. 2 Top Most Wanted Person (Provincial Level) iti maikatlo a kwarter ti agdama a tawen babaen iti operasyon nga insayangkat dagitoy ita nga aldaw idiay Km.5, Barangay Pico, La Trinidad, Benguet.
Inarestar ti Tracker Team ti La Trinidad Municipal Police Station ti Benguet ti lalaki, agtawen iti 43, naasawaan, ken awanan trabaho. Tubo daytoy ti Malabon, Metro Manila ken residente ti Central Tawang, La Trinidad, Benguet.
Naipatungpal ti pannakaarestar daytoy babaen iti bileg ti Warrant of Arrest a nai-isyu idi Agosto 5, 2026 babaen iti Presiding Judge ti Regional Court, First Judicial Region, Branch 9, La Trinidad, Benguet, iti krimen a Rape (Sexual Assault) ken tallo a bilang ti Statutory Acts of Lasciviousness, nga addaan iti pakabuklan a piyansa iti P444,000.
Iti agdama, adan ti naarestar iti kustodiya ti La Trinidad Municipal Police Station para iti dokumentasyon sakbay a maiyawat daytoy iti maseknan a korte para iti pannakaisubli ti Warrant of Arrest daytoy. //bombokaren.c.sapirao
