BAGUIO CITY – Nawaswasen ti pammilin para iti temporaryo a panakasuspindir dagiti tourism activities sadiay munisipyo ti Atok, Benguet.
Immunan a sinuspindir ni Atok Mayor Raymundo Sarac ti panagsarungkar dagiti turista kadagiti pagpasyaran sadiay kas paset ti precautionary measure ti munisipyo kontra iti outbreak ti corona virus disease – 2019.
Iti panakiyuman ti Bombo Radyo, kinunana nga uray nawaswas ti nasao a pammilin ken nailukat manen dagiti tourist destinations sadiay Atok kadagiti turista ket adda dagiti pagalagadan a nasken a suruten dagiti agpasyar sadiay.
Dinakamatna a maysa kadagiti kondisyon wenno precautionary measures a nainget a masurot ita sadiay ket ti polisiya a ‘no pre-registration, no entry’.
Inlawlawagna a nasken nga agparehistro nga umuna dagiti turista kadagiti tourism site owners wenno operators para iti panakakontrol ti bilang dagiti turista nga agturong iti maysa a destinasyon sadiay Atok.
Innayonna nga amin a turista wenno bisita ket nasken nga agparehistro pay iti nadutukan a registration area saiday Paoay Barangay Hall, Sayangan, Paoay, Atok, Benguet sakbay dagitoy nga agturong iti tourism site.
Maikalkalikagum pay ti panangipaay dagiti amin nga establishimiento sadiay iti hand sanitizer tapnu adda ti aramaten dagiti kustomer dagitoy.
