BAGUIO CITY – Nadangran ti maysa a truck helper kalpasan a naaddaanda iti padana a truck helper iti saan a panagkinnaawatan kabayatan ti panagay-ayamda ti arm wrestling wenno sanggol sadiay Kennon Road, Camp 7, Baguio City idi kanikadua.
Nabigbig ti biktima a ni Mark Anthony Nieva, 22-anyos bayat a nabigbig ti suspek a ni Leonardo Taguibao, 40-anyos, agpada dagitoy a tubo ti Aringay, La Union ken residente sadiay Kennon Road, Camp 7.
Sigun iti pulisya, agin-inom dagiti dua idi nagdesisyon dagitoy nga agsanggol.
Naabak ti suspek agingga a naaddaanda iti saan a panagkinnaawatan a nagresulta iti panangala ti suspek iti kutsilyo a nakadisso iti lamisaan ken killaat nga imbagsolna iti biktima.
Dagos a naglibas ti suspek babaen iti panagluganna iti taxi ken mapapati a nagturong ditoy siudad ti Baguio.
Naiturong met ti biktima iti pagagasan a nagsagrap ti maysa a bagsol iti kanigid a paragpag ken ita ket agpapaimbag.
An-anupen met ita dagiti pulis ti naglibas a suspek. (-with Bombo Nikki Agsiweng)
