Impasigurado ti Philippine Consulate General sadiay Los Angeles, a mangipatungapalda iti emergency operations tapno matulungan dagiti Pilipino a napukawan iti identification ken travel documents gapu iti nasaknap a wildfire sadiay Southern California.
Iti advisory, aglukat ti nasao a consulate manipud alas nuebe iti agsapa agingga iti alas dos iti malem inton Enero dise otso ken Enero baente singko.
Karaman kadagiti emergency services a maipaay ket passport/travel documents, consular notarization ken dadduma pay.
Saan metten a kasapulan ti agpa-appointment, ngem first-come, first-served basis daytoy.
Impetteng pay ti nasao a consulate nga agtultuloy ti operasyonda iti baet ti agtultuloy a panagramaram ti uram sadiay.
Iti agdama, dandanin dua gasut a Pilipino ti napukawan iti pagtaengan gapu iti uram.
