BAGUIO CITY – Nakali dagiti soldado ken pulis dagiti tulang ti dua a vendors a mapapati a pinapatay dagiti komunista a New People’s Army (NPA) sadiay Asipulo, Ifugao.
Sigun kenni Lt. Col. Narciso Nabulneg Jr., commander ti 54th Infantry Battalion ti Philippine Army, kinuna ti maysa a sigud a rebelde a napagbiddutan dagiti rebelde a soldado dagiti biktima nga agilaklako ti tolda ken plainer sadiay Sitio Gumhang ken Sitio Namal iti nasao a munisipyo.
Kinuna ti sigud a rebelde a pinapatay dagiti rebelde nga indauluan ti alyas Bombo ti dua a vendors iti pammati a soldado dagitoy.
Nadiskobre idi Martes, May 21 dagiti tultulang iti maysa a kakaykaywan a disso idi dalusan kuma daytoy ti maysa a residente sadiay Numpaling, Namal, Asipulo, Ifugao.
Nakita ti nasao a residente ti nakaruar a tulang a dagus nga inreportna iti nakabantay sadiay a soldado.
Binendisyonan ti maysa a padi dagiti bangkay sakbay a naiturong dagitoy iti maysa a punerarya.
Innayon pay ni Nabulneg a saan a pulos a nagbalin a tulong kadagiti komunidad ti presensia dagiti rebelde kadagiti ili gaputa mangimulmula laeng dagitoy iti buteng ken riribuk kadagiti umili.
Umap-apela daytoy kadagiti residente ti Ifugao iti panagbalin a vigilant dagitoy tapnu saan a manayonan pay dagiti biktima ti kinaranggas dagiti rebelde.
