Ka-Bombo, nakasagana kayu kadi para iti sabali nga adventure?
Kayat yu kadi a padasen ti kultura, scenery, historical art ken architecture ti Tuscany, Italy.
Bueno, nu nakasagana kayu iti adventure ket padasen yu nga agaplikar iti “Residenzialita in Montagna 2024” wenno Residency in the Mountains 2024 a programa ti Italy nu sadino maal-allukoy dagiti interesado nga indibidual nga agnaed iti kabambantayan ti Tuscany ken ti panagbalin dagitoy a permanent a residente sadiay.
Iti nasao a programa ket nailatang ti agarup P176 million ken bayat a naituding a maipaaay ti P1.8 million kadagiti indibidual nga interesado iti daytoy para iti paggastusanda, paggatangda iti balay wenno para iti usarenda a panangtarimaan iti agbalin a balayda.
Nangrugi met ti aplikasyon iti daytoy idi napalabasa bulan bayat nga agleppas daytoy inton Hulyo 27 iti agdama a tawen.
Panggep ti nasao a programa nga itandudo ti “repopulation” ken “socio-economic revitalization” kadagiti bambantay kasta met a tapno liklikan ti marginalization kadagiti nasao a lugar.
Maipalagip a ti Tuscany ket isu ti nagbalin a setting dagiti nalalatak a pelikula a pakairamanan ti Life Is Beautiful (1997), Gladiator (2000), Under The Tuscan Sun (2003), The Twilight Saga: New Moon (2010) ken daduma pay.
Malaksid iti dayta, daytoy met laeng ti hometown dagiti sikat nga Italian figures ti Renaissance period a kas ken da Michelangelo ken Filippo Brunelleschi.
