BAGUIO CITY – Nainget a bambantayan ti City Health Services Office (CHSO) dagiti umili ti Baguio a 30-40 anyos manipud iti COVID-19.
Inlawlawag ni Cecile Agpawa, dadaulo ti Health Risk Communication Team ti CHSO a daytoy ket gaputa dagiti nasao nga indibidual ti kadawyan a makapkaptan ti COVID-19, malaksid pay kadagiti 60-anyos nga agpangato.
Sigun kenkuana, nangato ti death rate wenno bilang dagiti matmatay a natataengan gapu iti epekto ti COVID-19 isut gapuna a pappapartakenda ti panakabakuna dagiti senior citizens.
Kabayatanna, imbilangna a kadawyan a pakailislistaan ita ti clustering dagiti kaso ti COVID-19 ket iti uneg dagiti pagtaengan, pagtrabahuan ken dadduma pay nga adda ti panagu-urnong ti tattao.
Gapu iti daytoy, ipalpalagipna manen ti panagtulnog dagiti umili kadagiti minimum public health standards kontra iti COVID-19.
