BAGUIO CITY- Ipalpalagip manen ti Regional Tripartite Wages and Productivity Board – Cordillera ti umno a panangsweldo dagiti employers kadagiti empleyado dagitoy.
Daytoy ket kalpasan a nag-epektibo idi kalman, Hunyo 14, ti P30 agingga P40 a kanayonan a sweldo dagiti mangmangged iti rehiyon.
Gapu iti daytoy, agbalinen a P380 ti inaldaw a sweldo dagiti formal sector workers partikular dagiti agtatrabaho iti Micro Small and Medium Enterprises.
Agbalin met a P4,500 ti binulan a sweldo dagiti domestic workers (kasambahay).
Immunan nga inlawlawag ni DOLE-Cordillera Regional Director Nathaniel Lacambra nga P60 kuma ti mainayonan iti minimum wage dagiti mangmangged iti Cordillera ngem nagudwa daytoy iti dua a tranche.
Impettengna a maiyaplikar ti kanayonan pay a P20 inton January 1, 2023 gaputa saan a mabalin a maigulpi ti P60 ita a tawen nangruna ta saan paylaeng a naan-anay a nakarekober dagiti negosyo manipud iti epekto ti pandemya.
Impaganetgetna a mabalin nga agreklamo iti DOLE dagiti empleyado a saan a makaawat iti umno a sweldo para iti panakaipataw ti kaskenan a pannusa kontra kadagiti employers.
