![](https://img.bomboradyo.com/baguio/2021/12/Carl-Jammes-Martin-1.jpg)
BAGUIO CITY – Nagballigi ti undefeated Igorot boxer a ni Carl Jammes “Wonder Boy” Martin iti kaunaan a kampanyana nga agbalin a national champion babaen iti panang-agawna iti titulo kas Philippine Super Bantamweight Champion.
Daytoy ket kalpasan nga inabakna ni Mark Anthony Geraldo babaen iti unanimous decision iti panagsangoda kenni Mark Anthony Geraldo ita a malem sadiay Parañaque.
Nagserbi ti 22-anyos a tubo ti Hingyon, Ifugao kas challenger bayat a ti 30-anyos a tubo ti Bukidnon a ni Geraldo ti defending champion.
Iti agdama, addaan ni Martin iti rekord a 18 wins, 0 (sero) loss nga addaan ti 15 knockouts bayat nga iggem met ni Geraldo ti rekord a 38 wins, 10 losses, 3 draws nga addaan ti 19 knockouts.
Inladawan ni Martin a daytoy ti ‘best fight’ ken karigatan a labanna nangruna ta national champion ken 50-fight veteran ni Geraldo.
Tarigagay pay ni Martin a no agbalin daytoy a national champion ti pagilian ket mapasayaat pay ti abilidadna kas maysa nga international campaigner nangruna ta puntiryana a mangabak iti regional crown inton sumaruno a tawen.
Pinili ti Games and Amusement Board ni Martin kas mandatory challenger iti maikatlo a panangidepensana ni Geraldo iti titulo daytoy.