BAGUIO CITY – Kondinaren ti dadaulo ti pulisya iti Baguio City ti aniaman a kita ti krimen wenno iligal nga aramid dagiti pulis iti Baguio City Police Office (BCPO).
Nagbalin a reaksyon daytoy ni BCPO City Director Police Colonel Allen Rae Co kasaruno ti panakakemmeg ti maysa nga unit chief daytoy gapu iti maatap a panagsugal iti maysa a casino resort sadiay La Union.
Immunan a naipadamag a nakemmeg ni Police Lt. Col. Armando Gapuz, dadaulo ti Police Community Relations Office ti BCPO gapu iti nasao a kaso ngem dagus a nawayawayaan.
Kinuna ni Pol. Col. Co a nainget ti panangsuportarada iti internal cleansing ti Philippine National Police tapno mailinteg dagiti iligal nga aramid dagitoy nangruna ta adda ti pammilin a mangipawpawil iti panagsugal dagiti pulis.
Innayonna a saanna a kanunungan ti inaramid ni Lt. Col. Gapuz ngem impasiguradona a nainget nga imbestigaranna ti nasao nga insidente.
Dinakamatna a naikkaten iti pwesto ti nasao a police official idi pay Dominggo.
Nupya kasta, kinunana nga awan paylaeng ti naipila nga administrative case kontra kenni Gapuz gaputa mangisayangkatda paylaeng iti imbestigasyon.
Maipalagip nga idi napalabas a bulan ti Abril ket kinemmeg ti PNP-CITF ni Pol. Lt. Col. Allan Docyogen, chief ti intel unit ti BCPO gapu iti panagkikilna iti maysa a robbery suspect.
