![](https://img.bomboradyo.com/baguio/2021/01/URAM-LOURDES.jpg)
BAGUIO CITY – Im-imbestigaran paylaeng dagiti personnel ti Bureau of Fire Protection – Baguio ti nagtaudan ti uram a nangdadael iti lima a balay sadiay Lourdes Subdivision Extension Barangay, Baguio City idi agsapa.
Iti interview ti Bombo Radyo Baguio, kinuna ni Punong Barangay Jeffrey Timmango a totally burned wenno naan-anay a nauram dagiti innem a balay bayat nga partially burned ti maysa pay a balay.
Kinunana a pito amin a pamilya a bukbuklen ti 27 nga indibidual ti napukawan ti pagtaengan gapu iti nasao nga uram.
Innayonna nga awan pulos ti kagawaan a nairuar dagiti nasao a pamilya gapu iti napartak a panagwaras ti apoy kadagiti babbalay dagitoy.
Dinakamatna nga adda dagiti agtalinaed iti evacuation center ti barangay hall bayat nga adda met dagiti agkamang iti kabagianda.
Innayonna a naipasidong iti profiling ken debriefing dagiti naapektaran a pamilya babaen iti Office of the City Social Welfare and Development.
Impanamnama pay ti kapitan ti panakaipaay ti kaskenan a tulong kadagiti napukawan a pamilya.
Naamuan a nangrugi ti uram iti alas nuebe ti agsapa ken naideklara a fire out kalpasan ti maysa nga oras.