BAGUIO CITY – Agtultuloy ti search, rescue and retrieval operation iti innem pay nga indibidual a nagaburan iti dakkel a panagreggay ti daga sadiay Sumigar, Viewpoint, Banaue, Ifugao.
Immunan a narekober ti bangkay ti lima bayat a maysa ti surviror.
Nabigbig dagiti narekober a bangkay a da Joel Chur-ig, 47-anyos, driver ti DPWH; Lance Bruce Gayagay Guinyang, 3-anyos; Dante Boqueng; Johnny Cabigat Duccog, 57-anyos, laborer ti DPWH ken Jose Piog, 71-anyos.
Kabayatanna, maysa a bangkay ti nasarakan iti Hapid River sadiay Lamut a kaabay nga ili ti Banaue.
Kinuna dagiti rescuers a posible a naiyanod iti nasao a karayan ti bangkay manipud iti ground zero sadiay Banaue.
Lamo-lamo ken nagsagrap ti adu a sugat ti bagi ti nasao a bangkay bayat a narigatan dagiti rescuers iti retrieval operation gapu iti kapigsa ti ayos ti danum iti karayan.
Immuna metten a nabigbig ti survivor a ni James Harold Guinyang nga ama ti pimmusay nga ubing.
Naiyakaren daytoy iti pagagasan sadiay Nueva Vizcaya para iti kanayonan a panakatamingna.
Iti salaysay ti survivor, manarimaan ti panagkapeda idi napasamak ti insidente.
Naamuan nga iti nasao a gundaway ket adda iti uneg ti balay ti agtagikua iti daytoy a ni Bresler Tucdaan ken ti anakna ken dagiti dumanon 10 nga indibidual a nakilinong kadakuada.
Mapapati a naiduron ti balay iti rangkis nga addaan kauneg a dumanon iti 100 a metro gapu iti nargaay a daga.
