BAGUIO CITY – Napaay dagiti vendors iti night market sadiay Harrison Road, ditoy siudad ti Baguio a mangaramid iti napagtulagan a batangda iti panakailukat manen ti pagbiagan dagitoy.
Inwaragawag daytoy ni Mayor Benjamin Magalong iti eksklusibo nga interview ti Bombo Radyo Baguio kalpasan a naala ti reaksionna iti napasamak a panakalabsing ti social distancing iti panaglukat manen ti night market idi rabii.
Sigun kenkuana, sakbay ti panakailukat manen ti night market ket adda ti serye ti panagtaripnong ken panagtulag iti nagbaetan dagiti pulis, POSD ken dagiti vendors para iti panagbinnadang dagitoy.
Nupay kasta, impettengna a ti napasamak idi rabii ket ‘one-sided’ gaputa dagiti laeng pulis ken POSD personnel ti nagaramid iti batangda.
Kinunana a nalipatan wenno napaay dagiti vendors a mangaramid iti batangda, no sadino, nasken nga adda ti maysa a grupo dagitoy a timmulong iti panakakontrol dagiti tattao.
Gapu iti napasamak, kinuna ni Mayor Magalong a babaen iti taripnongda kadagiti maseknan a night market vendors ket mabigbigda dagiti nagbalin a parikut ken makaaramidda ti solusyon wenno baro a sistema a masurot iti operasyon ti night market.
Inyunay-unayna a mailukat to manen ti night market iti kanito a naan-anay ti kumpiansana a maipatungpal dagiti dagiti mapagsaritaan a sistema iti operasyon sadiay.
Dinakamatna pay a malaksid a maisubli ti pagbiagan dagiti maseknan a vendors ket maysa ti night market kadagiti padpadaanan dagiti umili ken dagiti turista.
Nupay kasta, mamati met ni Public Order and Safety Division (POSD) Deputy Chief Daryl Kim Longid a balligi ti panakailukat manen ti operasyon ti night market idi rabii nupay adu ti saan a nagtungpal iti social distancing a paset ti paglintegan kontra iti COVID-19.
Sigun kenkuana, daytoy ket gaputa nalimitaran ti bilang dagiti pwesto a dimmanon laeng iti nasurok 400 ken naisayangkat ti two-way foot traffic tapnu maipanamnama ti saan a panagsasabat dagiti kustomer.
Innayonna a naiwaras met dagiti kameng ti POSD ken dagiti pulis a nangpalpalagip kadagiti kustomer sadiay kadagiti health protocols.
Dinakamatna a naiduma ti set-up ti night market idi rabii no idilig iti sigud a langa ken operasyon ti night market sakbay ti pandemya bayat a ti kaadu dagiti tao a nagturong sadiay idi rabii ket maidilig iti kaado dagiti tattao nga ap-apan iti merkado publiko.
Maipalagip a gapu iti kinakurang ti crowd control iti night market idi rabii ket sinuspindir manen ni Mayor Benjamin Magalong ti operasyon sadiay.
Natikitan pay ti nasurok 10 nga indibidual kabayatan ti panaglukat ti night market idi rabii gapu iti panaglabsingda iti Republic Act 11332 wenno ti Mandatory Reporting of Notifiable Diseases and Health Events of Public Health Concern Act.
Sigun kenni PMaj. Marlo Evasco, dadaulo ti Baguio City Police Office – Station 7, dagitoy ket naglabsing iti physical distancing ken saanda a nagaramat ti face shield.
Kinunana a saan a nasurot dagiti paglintegan kontra iti COVID-19 kagiddan ti panagrugi ti Christmas in Baguio wenno iti panakapasilaw ti Christmas Tree sadiay Upper Session Road ken ti panaglukat manen ti night market iti Harrison Road.
Impettengna a saanda met a nagkurang iti panagpalagip kadagiti umili ken kadagiti nakipaset kadagiti nasao nga aktibidad.
