BAGUIO CITY – Nagkalintegan ti COMELEC – Mt. Province iti panang-awat dagiti election officers iti daan a Certificate of Candidacies (COCs) nga impila ti dua a nagkandidato sadiay para iti masungad a midterm elections.
Iti panakiyuman ti Bombo Radyo Baguio kenni agdama a Kalinga Provincial Election Supervisor ken sigud a Mt. Province Provincial Election Supervisor Atty. Ricardo Lampac, impettengna nga nga awan ti bilegda a mangkorektar kadagiti COCs dagiti nagkandidato a maipaspasa kabayatan ti panagpipila ti COCs.
Kinunana a ‘ministerial duty’ ti COMELEC ti panang-awatda iti COC dagiti agkandidato.
Inlawlawagna a ti mandato ti ahensia ket ti mangkita no kompleto dagiti papeles nga isumitir ti agkandidato kas iti notary ken dadduma nga attachments ti COC.
Inyunay-unayna nga awan ti bilegda a mangsukimat iti detalye a linaon dagiti nasao a dokumento gaputa ti nasao a banag ket akem ti en banc ti komisyon.
Kinunana pay a nasken a mapaka-amuan ti publiko seknan kadagiti mandato ti komisyon kasaruno ti panakababalawda gapu iti napasamak a saan a panangbigbig ti COMELEC en banc iti daan a COC nga impila dagiti tallo a nagkandidato ditoy rehiyon Cordillera.
Iti baet daytoy, impeksana nga adda ti dagiti legal a wagas ken proseso a mabalin nga aramiden dagiti kandidato a naideklara a deemed not file.
Kinuna ni Atty. Lampac a mabalin nga agipila dagiti maseknan iti motion for reconsideration iti COMELEC en banc wenno iti Temporary Restraining Order sadiay Korte Suprema.
– timek ni agdama a Kalinga Provincial Election Supervisor ken sigud a Mt. Province Provincial Election Supervisor Atty. Ricardo Lampac iti panakiyuman ti Bombo Radyo Baguio
