BAGUIO CITY – Agtultuloy nga im-imbestigaran dagiti pulis ti motibo iti panakapalpaltog ti pimmusay a vegetable disposer sadiay Balili, La Trinidad, Benguet idi kalman.
Nabigbig daytoy a ni Jonathan Velasco Santiago, 38-anyos, naasawaan, tubo ti Kapangan, Benguet ken residente ti Balili, La Trinidad, Benguet.
Maibasar iti imbestigasyon dagiti pulis, apaman a nagdissaag ti biktima iti naglugananna a taxi ket killaat a pinalpaltogan daytoy ti dua a saan pay a nabigbig a suspek.
Atapen dagiti pulis a konektado iti ayat ti motibo ti napasamak a krimen kas maibasar kadagiti naalada nga impormasyon ngem agtultuloy daytoy a mabirbiripikar.
Narekober met iti nakapasamakan ti krimen ti 15 a pidaso ti basyo ti bala ken sumagmamano a metal fragment ti bala.
Agtultuloy pay ti panangsukimat ti pulisya iti video footage iti naala a CCTV camera a nakamuntar iti asideg ti nakapasamakan ti krimen.
