BAGUIO CITY – Simmuko iti pulisya ti suspek a nangbagbagsol iti maysa a taxi driver sadiay Kisad Road, Baguio City idi rabii ti Abril 4, Huwebes.
Nabigbig ti suspek a ni Juan Carlo de Peralta, 33-anyos, baro, awanan trabaho ken residente ti San Roque Village, Baguio City.
Naamuan a nagsagrap ti biktima iti 18 a bagsol iti nagduduma a paset ti bagina babaen iti suspek a nagpammarang a pasaherona.
Immunan a naiwaragawag a nagbiddut ti suspek iti binagbagsolna a biktima.
Sigun iti pulisya, saan a panag-hold-up ti motibo iti krimen gaputa naamuan a nabilin ti suspek a mangaramid iti nasao a krimen.
Impakita payen ti BCPO – Station 5 ti video a naala ti dash cam ti taxi ken impablaakda ti screen shot ti langa ti suspek iti social media.
Agtultuloy met ti panagpaimbag ti biktima.
