BAGUIO CITY – Nabigbigen ti tallo kadagiti lima a suspek a maatap a hijackers a napapatay dagiti pulis sadiay Tuba, Benguet kalpasan a nagresulta iti panagpinnaltog ti hot pursuit operation kadagitoy idi parabangon ti Miyerkoles, Hunyo 30 ti agdama a tawen.
Maibasar iti report ti Police Regional Office Cordillera, mismo a dagiti kabagian dagiti tallo ti nangbigbig kadagitoy.
Nabigbig dagiti tallo a da David Dassala Rapal Jr., 40-anyos, awanan trabaho, residente ti San Fernando, Pampanga; Ryan Amurao Pangilinan, 41-anyos, truck driver, residente ti Mexico, Pampanga ken Relly Amurao Castillo, 43-anyos, construction worker, residente ti Arayat, Pampanga.
Naamuan a ni David Rapal Jr. ti nakasuot iti athletic t-shirt ti pulisya, camouflage green pants ken black leather shoes bayat a ni Ryan Pangilinan ti nakasuot iti pink t-shirt ken light blue maong pants ken ni Relly Castillo ti nakasuot ti orange t-shirt ken maong pants.
Iti salaysay dagiti kabagian dagiti tallo, sinukon ni Ryan Pangilinan ni David Rapal Jr. iti pagtaenganda idi agsapa ti Lunes, June 28 agingga a saanen daytoy a nagaw-awid bayat a ti ammo ti pamilya ni Ryan Pangilinan ket napan nagtrabaho daytoy iti kapada nga aldaw agingga a saanen a nagaw-awid.
Impaka-ammo met ni Relly Castillo nga agtrabaho daytoy kas truck helper ni Ryan Pangilinan idi Dominggo, Hunyo 27 agingga a saanen daytoy a nagaw-awid.
Naamuan pay a nagkadwa iti selda iti San Fernando Provincial Jail da Rapal Jr. ken Pangilinan gapu iti kasoda iti iligal a droga ken nakaruarda iti pagbaludan idi napalabas a bulan ti Abril.
Iti agdama, naiyawiden ti bangkay dagiti tallo iti bukodda a pagtaengan sadiay Pampanga bayat nga agtultuloy ti imbestigasyon dagiti otoridad iti pakabigbigan dagiti dua pay a suspek ken ti dadduma nga anggulo ti insidente.
