BAGUIO CITY – Sumangsango iti kaso a Falsification of Public Documents ti dua a lallaki kalpasan a nakemmegda iti naisayangkat nga entrapment operation idi kalman iti maysa a computer shop ditoy siudad ti Baguio gapu iti panagaramid ken panagilakoda kadagiti peke a travel authority ken medical certificates.
Binigbig ni Baguio City Police Office (BCPO) City Director PCol. Allen Rae Co dagiti natiliw a da Ace Dicca, 25-anyos, agtagikua iti computer shop ken Wilfred Pinyuhan, 22-anyos, computer shop attendant.
Naisayangkat ti operasyon sadiay T. Alonzo Street, Baguio City babaen iti entrapment operation kalpasan a nakaawat dagiti pulis iti impormasyon manipud iti maseknan nga umili mainaig iti modus operandi dagiti suspek a maatap a nangrugi idi pay napalabas a bulan.
Nagpammarang a kustomer ti Play Grounds Computer Shop ti uppat nga operatiba ken sadiay a nagpa-aramidda ti saggaysa a medical certificate, travel authority ken health declaration form iti gatad a sag-50 tunggal dokumento wenno katukad ti P600.
Naaramat kadagiti peke a dokumento ti pirma ni PCol. Co ken ti Medical Officer IV ti Baguio City Health Office.
Nakumpiskar met iti operasyon dagiti computer set nga ar-aramaten dagiti suspek iti modus dagitoy ken ti naaramat iti operasyon a marked money.
Maipalagip nga iti implementasyon ti General Community Quarantine iti entero a Cordillera ket kasapulan nga iparang ti Medical Certificate ken Travel Authority kadagiti border checkpoints no sumrek iti Baguio City.
