Impablaak ti Pentagon a dagos a rugianna ti panangiproso ti pangikat iti agarup 1, 000 a transgender troops manipod iti United States military, maibasar iti pammilin ni US President Donald Trump a mangiparparit kadagiti transgender nga agserbi iti military.
Maibasar iti memorandum ni Defense Secretary Pete Hegseth, dagiti transgender personnel a boluntario a nangibaga a panggepda nga umikkat sakbay ti Marso 26 ket dagos a maiproseso dagiti dokumentoda para iti separation dagitoy, bayat a dagiti saan a rummuar ket mapilit a maikkat iti serbisio inton Hunio sais para kadagiti active-duty ken Hunio a siete para kadagiti reserves.
Pakabuklan a 4,240 a kameng ti military nga addan ti diagnosis ti gender dysphoria idi napalabas a tawen, sigun iti Department of Defense.
Iti nasao a builang, agarup 1,000 ti mabalin a maipasidong iti baro a pagannurutan.
Nangiruar ni Trump iti executive order idi Enero 27, nu sadinno kinunana a ti “false gender identity” ket saan a maitunos iti nangato a pagalagadan ti serbisio militar.
Sinaruno daytoy ti Pentagon memorandum idi Pebrero, a mangibagbaga a maikkat ti transgender troops malaksid laeng nu addaan ti special waiver.
Maipalagip a ti polisia ket paset ti serye ti panagbalbaliw ti patakaran maipapan kadagiti kameng ti transgender service members — a nalaka a maus-usar iti sidong dagiti Demokratiko nga administrasion, ngem ad-adda a naing-inget iti sidong ni Trump.
