BAGUIO CITY – Maur-uray laengen ti maituding nga aldaw para iti panakabakuna dagiti frontliners ti Baguio City Public Market kontra iti COVID-19.
Sigun kenni City Market Supervisor Marieta Alvarez, nakasaganan ti Rillera Building nga agserbi a vaccination center dagiti stakeholders ti merkado publiko ti siudad.
Dinakamatna a kiniddawna ti tulong dagiti dadaulo dagiti nagduduma a section ti merkado publiko para iti panakakolektar ti nagan dagiti frontliners a kayatda ti agpabakuna kontra iti COVID-19.
Kinunana a karaman kadagiti maakomodar iti nasao a panagbakuna ket dagiti vendors ken porters wenno komboy ken dagiti agtagikua kadagiti pasdek iti masakupan ti merkado publiko.
Immunan nga imbilin ni Mayor Benjamin Magalong ti panakapangruna iti panagbakuna kontra iti coronavirus dagiti agilaklako ken dagiti komboy iti merkado publiko gapu iti masansan a panakipulapol dagitoy kadagiti gumatgatang a tattao.
