Nagkari ni Vice President Sara Duterte a mangipaay ti opisinana iti tulong kadagiti Pilipino a naarestar idiay Qatar kalpasan a nangipatungpal dagitoy iti rally idi napalabas a lawas.
Sigun kenni VP Duterte, makikoordinar ti Office of the Vice President kadagiti dadduma nga ahensiya ti gobyerno tapno mapagsaritaan nu anya a klase ti tulong ti mabalin nga ipaay ti opisinana kadagiti naarestar a Pilipino.
Immunan nga impasigurado ti Malakanyang a saan a baybay-an ti gobyerno dagiti natiliw nga OFW ken mangipaay dagitoy iti kaskenan a tulong.
Kabayatanna, dinakamat ni Foreign Affairs Undersecretary Eduardo de Vega a 20 a Pilipino ti natiliw idiay Qatar gapu iti pannakipasetda iti political rally a possible nga adda pakainaiganna iti panangkontrada iti pannakatiliw ni sigud a President Rodrigo Duterte a sumangsango iti kaso a crimes against humanity.
Impanamnama pay ni De Vega a mangipaay ti Embahada ti Pilipinas idiay Qatar iti legal assistance iti kanito a mapilaan iti kaso dagiti natiliw nga OFW nangruna ta mabalin a maibalud dagitoy iti tallo a tawen.
Manipud iti 20 a bilang dagiti natiliw nga OFW, lima a babai ken 12 a lallaki ti agtaltalinaed iti kustodiya dagiti otoridad bayat a dagiti tallo nga ubbing a karaman a natiliw ket nawaya-wayaan.
