BAGUIO CITY – Pimmusay ti maysa a driver kalpasan a nadungpar ti maysa a flatbed truck a napukawan ti preno iti deppaar ti Lower Buhagan Road iti siudad ti Baguio idi kalman.
Nabigbig daytoy a ni Henry Layosan Payang, 38-anyos ken residente ti Pandayan, Tadian, Mountain Province.
Nabigbig met ti driver ti flatbed truck a ni Elmer Pecdados Langgoy, 46-anyos ken residente ti Norzagaray, Bulacan.
Maibasar iti report ti pulisya, nagtaud ti flatbed truck sadiay Naguilian Road ken pasalog iti Buhagan Road paturong iti Ferguson Road 2 wenno Guisad.
Nupay kasta, maatap a napukaw ti preno ti flatbed truck a rason tapnu agtultuloy ti panagsalogna iti kalsada agingga a nadungpar ni Payang ken maysa nga elf truck a nakaparada iti igid ti kalsada.
Naamuan iti imbestigasyon ti pulisya nga aglugan kuman ni Payang iti truck-na kalpasan nga insimpana dagiti ginatangna iti likod ti lugan.
Naamuan pay a sakbay ti panakadungpar ni Payang ket nabaelan pay ni Langgoy nga agbusina.
Nagsanggir ni Payang iti igid ti truck-na ngem na-sideswipe ken naipit daytoy iti nagbetan ti dua a truck a nangitunda iti dagus nga ipupusayna.
Naiturong ti bangkay ti biktima iti punerarya bayat a naiturong ni Langgoy iti istasyon ti pulisya para iti panakaiprosesona.
Manamnama a sumango ni Langgoy iti kaso a homicide with damage to property through reckless imprudence.
