BAGUIO CITY – Dumanonen iti walo pulo ket lima ti bilang dagiti drug personalities a nakemmeg iti nagduduma a probinsiya iti rehiyon Cordillera iti umuna a kwarter ti agdama a tawen.
Iti panakiuman ti Bombo Radyo Baguio, kinuna ni Rosel Sarmiento, Public Information Officer ti PDEA-Cordillera, natiliw dagiti drug personalities manipud iti 461 nga anti-illegal drug operation nga impatungpal ti nagtipon a pwersa dagiti nagduduma a yunit ti pulisya ken PDEA.
Dinakamatna a nangatngato ti bilang dagiti natiliw iti umuna a kwarter ti agdama a tawen nu idilig iti uppat a pulo ket siyam a drug personalities a natiliw idi napan a tawen iti kapada a bulan.
Nupay kasta, impetteng ni Sarmiento a nangatngato ti anti-illegal drug operation nga impatungpal ti PDEA ken PNP idi napan a tawen gaputa dumanon daytoy iti 520 nga operasyon.
Sigun pay kenni Sarmiento, agtultuloy ti panangdalus-da kadagiti nabatbati a drug affected barangay tapno mawaya-wayaanen dagitoy manipud iti iligal a droga.
Maibasar iti datus ti PDEA-Cordillera, pakabuklan nga innem a pulo ti drug affected barangay iti entero a Cordillera ngem naksayan daytoy kalpasan a naideklara kas drug cleared barangay ti sangapulo ket maysa kadagitoy iti umuna a kwarter ti agdama a tawen.
Manipud iti nasao a bilang, pito a barangay sadiay Abra ti naideklara kas drug cleared, tallo sadiay Apayao, maysa sadiay Benguet, dua sadiay Ifugao ken dua sadiay Kalinga.
Kabayatanna, adda ti sangapulo ket maysa a drug-affected barangay iti Baguio City pakairaman ti Barangay Irisan, St. Nino, Fair View, Dominican Mirador, Lourdes Extension, Kayang Extension ken daduma pay.
Iti met Benguet, dua ti drug affected barangay pakairaman ti Abatan sadiay Buguias ken Barangay Pico sadiay La Trinidad.
Mangnamnama met ni Sarmiento a madalusan amin dagiti nakadamat a barangay manipud iti iligal a droga iti maika-dua a kwarter ti agdama a tawen agingga inton sumaruno a tawen.
