BAGUIO CITY – Pinilaanen iti kaso ni Baguio City Mayor Benjamin B. Magalong dagiti walo nga opisyales ti Baguio City District Engineering Office of the Department of Public Works and Highways (BCDEO-DPWH) ken maysa a pribado a kontraktor gapu iti maatap a pananglabsingda iti Republic Act No. 3019 wenno ti Anti-Graft and Corrupt Practices Act.
Ti affidavit-complaint ti mayor ket naawaten ti Office of the Ombudsman sadiay Quezon City idi July 5, 2022.
Karaman kadagiti napilaan iti kaso da BCDEO District Engineer Rene F. Zarate; Assistant District Engineer Glenn V. Reyes; ken Engineers Cesario L. Rillera, Gil L. Nuque, Nora R. Delos Santos, Alfredo O. Bannagao Jr; Project Engineer Tedler Depaynos ken Administrative Officer V Maria Luisa V. Batac; kasta met ti kontraktor a ni Wilfredo E. Gopeng iti W.E.G. Construction.
Ti nasao a kaso ket gapu iti P10.4 million ti gatadna nga off-carriageway improvement project ti DPWH sadiay Andress Bonifacio Road nga addaan iti contract duration nga 120 calendar days.
Inlawlawg ti opsiyal a saan a nasayaat ti kalidad ti nasao a patrabaho kas maibasr iti panagsukimat dagiti opisyal ti City Engineering Office ken CBAO.
Kinuna ni mayor Magalong a maibilang a kurapsiyon ti panakapaay ti kontraktor a mangtarimaan kadagiti depekto ken nagkurangan ti nasao a proyekto.
Innayonna a napaay ti DPWH-BCDEO a mangiwanawan ken mangimaton iti nasao a proyekto tapno maipanamnama ti nasayaat a kalidad daytoy.
