BAGUIO CITY- Pimmusay ti maysa nga indibidual bayat a nadangran ti kasinsin daytoy kalpasan a natnagda iti rangkis nga addaan kauneg a 100 metro sadiay Sitio Pangablan, Tuel, Tublay, Benguet idi kalman ti rabii (Abril 24).
Nabigbig ti pimmusay a ni Noel Potistad, 30-anyos, naasawaan, mannalon bayat a ti nadangran ket ni Jerome Tequillo, 24-anyos, agpada a tubo ti Tacloban, City, Leyte ken residente ti Sitio Pangablan, Basil, Tublay, Benguet.
Maibasar iti imbestigasion dagiti otoridad, nag-iinom dagiti biktima manipud alas sais ti rabii agingga alas nuebe ti rabii idi Abril 24.
Immuna nga inmikkat ni Potistad manipud iti kampo a naginumanda ngem sumagmamano laeng a minutos ket nakangeg ni Tequillo iti pukkaw nga agkidkiddaw ti tulong.
Dagus a rimwar daytoy ken sadiay a nakitana ni Potistad a natnag iti rangkis.
Inkagumaan pay ni Tequillo a tulongan ti kadwana ngem natnag metlaeng daytoy iti rangkis.
Nagsagrap ni Potistad ti dunor iti ulona a nangitunda iti ipupusayna bayat a nagsagrap met ni Tequillo ti dunor iti nagduduma a paset ti bagina.
Nirespondean dagiti personnel ti MDRRMO, EMS-BFP Tublay ken Tublay MPS kadwada dagiti volunteer ti nasao nga insidente.
Natalged ita ti kasasaad ni Tequillo ken agtultuloy ti panagpaimbag daytoy.
