BAGUIO CITY – Pimmusay ti maysa nga indibidual bayat a nadangran ti 11 a dadduma pay kalpasan a natnag iti rangkis ti naglugananda a parapasahero a jeep iti Sagubo-Gadang Provincial Road, partikular sadiay Mocgo, Sagubo, Kapangan, Benguet idi rabii.
Maibasar iti report ti Kapangan Municipal Police Station, ti parapasahero a jeep ket addaan ti plaka nga AYL 894 ken imanmaneho ni Carlito Manuel, 53-anyos, naasawaan, residente ti Gadang, Kapangan, Benguet.
Nailanad iti report a kabayatan ti panagsalog ti lugan iti provincial road ket naikadlis daytoy a nagresulta iti panakatnagna iti rangkis nga addaan kauneg nga agarup nasurok 250 a metro.
Naamuan a nagtaud ti nasao a lugan manipud iti siudad ti Baguio ken paawid sadiay Gadang, Kapangan, Benguet ken naglaon ti 15 a pasahero pakairamanan ti driver.
Dagus met a nagresponde dagiti pulis ken bombero kalpasan a naipadamag kadagitoy ti insidente.
Naitaray iti Benguet General Hospital (BeGH) ti innem kadagiti pasahero a nabigbig a da Mario Polon, Lanie Lacwayan, Chai-an Langcao, Jhemimah Langaoan, Carlito Manuel ken Sarsenia Sapigao, 63-anyos.
Nupay kasta, pimmusay ni Sapigao kabayatan ti panakatamingna iti BeGH gaou iti nasagrap daytoy a multiple injuries partikular iti ulo.
Agtaltalinaed met iti Kapangan District Hospital da Wennie Manuel, Ritch Brandon Carino, Estrella Waclin, Corazon Lacwayan, Josephine Dagdag ken Jovie Langaoan.
Dagus met a nakaruar iti pagagasan da Dexter Buyao, Jonard Alejandro ken Jonie Jade Assan.
