BAGUIO CITY -Dumanon iti nasurok 100 a tonelada ti repolyo ken dadduma a klase ti nateng ti ginatang ni Benguet Congressman Eric Go Yap ken naiwaras a libre idiay Metro Manila.
Sigun iti opisyal, maysa a wagas daytoy tapno matulongan dagiti mannalon tapno makarekober ti nagbalin a pukaw wenno panakalugida iti panagdalapos ti bagyo a Carina ken ti Habagat idi naglabas a bulan.
Maipalagip a nagbalin a karit kadagiti vegetable traders ken disposers ti Benguet ti panagserra dagiti kangrunaan a kalsada rason nu apay a saan a naibiyahe dagiti produktoda a nateng iti nagduduma a probinsya.
Immuna a naobserbaran ti atiddog a pila dagiti vegetable truckers iti Benguet Agri-Pinoy Trading Center (BAPTC) kadagiti naglabas nga aldaw nu sadino inikkan ni Cong Yap ti taraon dagiti mannalon bayat ti panagpilada sadiay.
Maipalagip pay nga impila ti manmanday-linteg ti House Bill 9889 tapno maikkan bileg ti Department of Agriculture tapno iregulate-da dagiti farmgate prices kadagiti highly perishable vegetables.
Inlawlawagna a maisaksakripisyo ti pagbiagan dagiti vegetable farmers nangruna nu nababa ti presyo ti nateng.//Bombo Jordan Tablac
