BAGUIO CITY – Naggigiddan a simmuko ti 11 a miembro ti rebelde a New People’s Army (NPA) kadagiti otoridad sadiay Bontoc, Mountain Province idi kalman.
Iti interview ti Bombo Radyo kenni LtCol. Narciso Nabulneg Jr., Commanding Officer ti 54th Infantry Battalion ti Philippine Army, kinunana a resulta daytoy ti kampanya ti Task Force To End Local Communist Armed Conflict ti Mountain Province.
Kinunana a dagiti simmuko ket kameng ti nagduduma nga unit ti Kilusang Larangang Guerilla Marco Command ti NPA – Ilocos Cordillera Regional Committee.
Insuko dagiti nasao nga indibidual ti maysa a granada, sag-dua a carbines ken shotguns, maysa a converted 5.56 rifle ken napapateg nga impormasyon a nagresulta iti panakadiskobre ti nagduduma a pampabettak.
Kinunana a simmuko dagiti nasao a rebelde gapu iti nagduduma a rason, nangruna ti mapaspasaran dagitoy a panagrigat bayat ti kaaddada iti bantay.
Dinakamatna a dagiti simmuko a rebelde ket biktima laeng ti ‘brainwashing scheme’ ken panangallilaw ti komunista a grupo.
Pinadayawan met ni Nabulneg dagiti mangbukbukel iti Task Force To End Local Communist Armed Conflict sadiay Mountain Province a nangidaulo iti negosasyon para iti isususko dagiti nasao nga inbidibidual ken iti agtultuloy a panaggaed dagitoy tapnu maragpat ti kappia ken panagdur-as iti Montañosa.
