BAGUIO CITY – Agtultuloy ti imbestigasion iti napasamak nga uram iti maysa nga istruktura sadiay Sablan, Benguet idi malem kalman a nakatayan ti maysa nga ubing.
Iti pannakipatang ti Bombo Radyo-Baguio ken ni Fire Inspector Melvin Quidilig, Fire Marshal ti Sablan Fire Station, kinunana a pimmusay iti insidente ti maysa nga ubing a lalaki nga agtawen iti 11.
Nupay kasta, saanen a nangipaay ti opisial iti kanayonan a detalye maipapan iti pakabigbigan ti biktima kas maitunos iti kiddaw ti pamilya daytoy.
Kinunana a nangrugi ti uram idi alas 3:50 idi malem kalman ken dagus a nagresponde dagiti otoridad ken naideklara ti fire-out iti oras ti alas 5:30 ti malem.
Inlawlawagna a ti nauram ket dua a kadsaaran a daan nga istruktura a paset ti Sablan Central School ngem daytoy ken abandonado isut gapuna a pagnanaedan ti sumagmamano nga indibidual.