BAGUIO CITY – Agpapaimbag ita dagiti 11 nga indibidual kalpasan a naaksidente ti naglugananda a van iti paset ti Baguio-Benguet Nueva Viscaya National Road, partikular sadiay Adonot, Ambuklao, Bokod, Benguet idi kalman.
Sigun iti Bokod Municipal Police Station, simmardeng ti nasao a van nga addaan plaka nga XAZ 662 iti sangwanan ti maysa a panganan tapnu agkabil ti danum iti radiator.
Nupay kasta, idi inikkat ti driver ti kalso iti pilid ti van ket killaat daytoy nga immabante iti pasalog a kalsada.
Patien dagiti pasahero a saan a nagkurri ti preno ti van.
Sigun iti pulisya, nagtultuloy nga immabante ti van iti pasalog a kalsada agingga nga imbangga ti driver iti paset ti igid ti bantay, agarup nasurpl 200 a metro manipud iti nagsardenganda a panganan.
Kalpasanna, nabaliktad ti van a nagresulta tapnu agsagrap iti dunor dagiti 10 a pasahero ken ti driver dagitoy.
Dagus met dagitoy a naitaray iti pagagasan babaen iti ambulansia ti Barangay Ambuklao, Bokod ken ti ambulansia ti munisipyo ti Paracelis, Mountain Province a nairana a dimmalyasat sadiay.
