BAGUIO CITY – Naimula ti dumanon 130 a bonsai pine trees kadagiti parke ken igid dagiti kalsada ditoy Baguio kas paset ti agtultuloy a kampanya ti lokal a gobyerno a panangpapintas iti aglawlaw ti siudad.
Sigun kenni City Environment and Parks Management Office (CEPMO) staff Floro Bastian, naimula dagiti nasao a puon ti pine trees sadiay Wright Park, Burnham Park, Valenzuela Park, iti Lower ken Upper Session Road, iti aglawlaw ti rotunda ti Baguio General Hospital and Medical Center ken iti Pacdal Circle.
Linawlawaganna met a saan nga agbalin a pasali dagiti naimula a bonsai pines trees gaputa dagitoy dagiti variety ti pine trees a limitado laeng ti dumakkelanda.
Maipalagip nga ipawpawil ti Department of Public Works and Highways ti panagmula ti kayo kadagiti kalsada gapo iti posible a panakadadael dagiti kalsada iti kanito a dumakkel dagitoy.
Nupay kasta, impanamnama ti CEPMO a saan a madadael dagiti kalsada nga ayan dagiti nakaimulaan dagiti nasao a bonsai trees gaputa dagiti personnel ti ahensia a nagmula ket naipasidong iti nainget a panagsanay iti sidong dagiti eksperto manipod Japan tapnu maipanamnama nga umno iti panakaaywan dagiti inmulada a bonsai pine trees. (with Bombo Brigitte Marcasi)
