Makidkiddaw ti kanayun a personel nga agronda sadiay Barangay Shilan, La Trinidad, Benguet.
Kasaruno daytoy iti naduktalan a 14 a kahon a naglaun iti nabuong a sarming, partikular iti Shilan-Lamut Road idi March 11, 2026.
Kidkiddawen metlaeng dagiti maseknan nga opisiales iti nasao a baranga ti kooperasyon ti publiko seknan iti umno a pannakaibelleng ti basura.
Sigun kenni Arthur Pedro, Municipal Environment and Natural Resources Office Designate, impakaammo dagiti opisyales ti barangay Shilan ti nasao a basura.
Naikali metten dagiti basura iti landfill sadiay Alno, La Trinidad.
Mainaig iti dayta, awan ti pakailasinan iti nagtaudan ti nasao a basura ken saan a konektado iti “broken glasses” a naibelleng metlaeng iti Munisipyo ti Tuba itay nabiit.
Malaksid iti dayta, awan metlaeng ti nakasaksi agsipudta, adayo daytoy kadagiti residential areas.
Kabayatanna, nagballaag ni Pedro kadagiti umili ken motorista kontra iti illegal a panagibelleng iti basura.
Sigun kenkuana, maipataw ti umno a pannusa ken multa iti siasino nga aglabsing iti ordinansa seknan iti umno a mangibilleng iti basura.//via Bombo Noveh Organo
