BAGUIO CITY – Malamlamayan ti maysa a barito kalpasan a nalmes iti Binanga Falls sadiay Sabdang, Shilan, La Trinidad, Benguet idi kanikadua.
Nabigbig daytoy a ni Marco Oracion, 15-anyos, estudyante ken residente ti La Trinidad, Benguet.
Maibasar iti report, nakaawat ti tawag ti kapitan ti Barangay Shilan seknan iti nasao nga insidente ken dagusna met nga inyuman daytoy iti La Trinidad Fire Station.
Naamuan nga inawis dagiti pagayamna ti nasao a barito nga agturong iti nasao a dissuor ngem nagkedked daytoy gaputa adda ti dunor ti kanawan nga imana ngem pinilit latta daytoy dagiti pagayamna.
Nagi-inom dagitoy iti abay ti karayan sakbayda a nagna iti igid ti karayan tapno aglangoy kuma ngem naigalis ti barito a nangitunda iti panakatnagna iti karayan.
Inkagumaan dagiti kakadwana a tulungan daytoy ngem saanda a nabaelan bayat a dagiti dadduma a kakadwada ket nagkiddaw ti tulong manipod kadagiti residente sadiay.
Dagos a nagresponde dagiti personnel ti La Trinidad Fire Station ngem saanen a naispal ti biktima.
