Impasigurado ti lokal a gobyerno iti Probinsya ti Benguet ti agtultuloy a serbisyo dagitoy kadagiti Overseas Filipino Workers idiay pagilian a Hongkong.
Daytoy ket kalpasan ti pannakaipatungpal ti maika sangapulo ket pito nga Adivay Festival iti nasao a pagilian idi kalman, impasigurado ni Benguet Congressman Eric Go Yap ti panangipaay ti lokal a gobyerno iti kanayunan a financial assistance iti Benguet Federation sadiay.
Ti Benguet Federation idiay Hongkong ket buklen dagiti umili wenno tubo iti probinsya ti Benguet nga ag t-trabaho iti agdama idiay Hongkong.
Sigun kenni Yap, nakasagana dagiti opisyales iti probinsya ti Benguet kangrunaan dagiti nagduduma a mayors manipud iti sangapulo ket tallo a munisipyo iti probinsya ti Benguet nga agtitinulong tapnu maipaayan iti kaskenan a tulong pinansiyal dagiti OFWs nga iBenguet nga agkasapulan iti pinansiyal a tulong nu agkasakit dagitoy.
Kasta pay, impeksa ti Congressman a sidadaan daytoy a mangipaay iti 300, 000 pesos a seed money para iti Benguet Federation tapnu ada ti mausar dagiti iBenguet OFWs kadagiti nagduduma a panggep kas iti panangsupusopda kadagiti hospital bills dagiti iBenguet OFWs nga agkasakit sadiay Hongkong.
Innayonna pay a sidadaan daytoy a tumulong kadagiti agkasapulan nga iBenguet idiay Hongkong babaen ti pannakiumanda kadagiti problema wenno tulong a kailangan dagitoy iti Presidente ti Benguet Federation.
Mainaig iti dayta, balligi met ti pannakaipatungpal ti nasao a selebrasyon nu sadino dinar-ayan dagitoy dagiti ginasgasut nga iBenguet OFWs, opisyales manipud iti probinsya ti Benguet ken dagiti performers a pakairamananda Ingrid Payakit ken Alladin Bag-ayan.
Ti nasao a selebrasyon ket adaan iti tema a “Sustaining cultural identity through camarederie amongst OFWs”.
