Naipakita dagiti Persons Deprived of Liberty(PDLs) wenno dagiti balud ti talento ken creativityda iti naangay a 1st Regional BIDA Painting, Handicraft-Making & Songwriting Challenge ita nga aldaw iti kalatakana mall iti siudad.
Ti nasao nga aktibidad ket paset ti programa ti Department of the Interior and Local Government(DILG) nu sadino, pinasetan daytoy dagiti balud manipod nagduduma a lokasyon ti Bureau of Jail Management and Penology-Cordillera.
Sigun kenni Jail Superintendent Mary Ann Tresmanio, Regional Chief of Staff ti Bureau of Jail Management and Penology-Cordillera, naipaayan ti cash price dagiti inmate a nangabak ken dagitoy ti manamnama a mangirepresentar iti nasao nga opisina iti national level.
Innayon ni Tresmanio a panggepda nga ipakita ti pakabigbigan ken kultura ti Rehion Cordillera babaen iti nasao a programa.
Mainaig iti dayta, naobserbaran nga adu a mall goers ti nangtagiragsak ken naggatang kadagiti naidiaya a produkto dagiti Persons Deprived of Liberty(PDLs).
Karaman kadagiti produkto nga inaramid dagiti balud a naidisplay iti nasao a mall dagiti nalalagda ken beaded a bag, wooden clock, glasswares, walis tambo, ken daduma pay a wooden crafts.
Daytoy ket paset metlaeng ti 1st Regional BIDA Painting, Handicraft-Making & Songwriting Challenge a mangpangpanggep a tulungan digiti balud ken ti pamilya dagitoy babaen iti mapataudda a pamastrekan manipod kadagiti inaramidda a produkto.
Impeksa met ni Tresmanio ti kinaragsakna iti nagbanagan ti nasao nga aktibidad gapu ta naobserbaran daytoy nga adu dagiti naaddaan ti interes kadagiti naidisplay a produkto pakairamanan dagiti dimmayo iti siudad ti Baguio.
Kabayatana, maysa laeng nga aldaw a naangay ti nasao nga aktibidad.//Bombo Jez Lapizar
