BAGUIO CITY – Sumangsango iti kaskenan a kaso ti dua a gangannaet kalpasan a nagaramatda kadagiti peke a dokumento tapnu laeng makastrekda ditoy siudad ti Baguio idi Lunes, January 4.
Nabigbig dagitoy a da Racheal Fumilayo Owoborode, 22 ken Chinazor Franklin Obiekezie, 26, agpada a Nigerian nationals.
Maibasar iti report ti Baguio City Police Office – Station 9, pinara dagiti pulis a mangimanmando iti quarantine checkpoint sadiay Purok 3, Irisan ti kotse nga addaan plaka nga ASA 9672 tapnu sukimaten ti travel documents dagiti nakalugan iti daytoy.
Imparang dagiti dua ti resulta ti Rapid Antibody Test dagitoy nga inted ti Chinese General Hospital and Medical Center idi December 30, 2020.
Nupay kasta, dagus a nagduadua dagiti pulis iti kinapudno dagiti dokumento gapu iti kaawan ti dry seal ken ti pirma ti issuing clinic.
Gapu iti daytoy, tinawagan dagiti pulis ti nailanad a nagan ti klinika ngem sadiay a nakumpirmar nga awan ti impapaayda nga aniaman nga RT-PCR test result kadagiti dua a gangannaet.
Naduktalan pay nga awan iti listaan ti clinika ti CVO number a nakalanad iti imparang dagiti gangannaet a dokumento.
Gapu iti daytoy, naiturong dagiti gangannaet iti istasyon ti pulisya para iti panakaiproseso dagitoy ken iti panakaipila ti kaseknan a kaso kontra kadakuada.
