BAGUIO CITY – Agserbi kas quarantine facilities ti DPWH-Cordillera ti Secretary’s Cottage ken ti National Training Center daytoy para kadagiti empleyado ti ahensia a possible cases ken suspected cases ti COVID-19 nga agtaud manipud kadagiti probinsia dagitoy.
Maitunos daytoy iti Bayanihan to Heal as One Act, partikular ti probisyon iti panakaipaay ti umdas a self-quarantine facilities para kadagiti employedo ken job orders ti gobyerno a nabigbig a possible cases wenno suspected cases ti COVID-19.
Maisagsaganan dagiti nasao a pasilidad kas paset ti Post Quarantine “Return to Work” Safety/Prevention Measures ti DPWH-Cordillera.
Manamnama a maka-akomodar dagiti dua a pasdek iti 44 a possible cases ken suspected cases ti COVID-19.
Adda metten ti nakasagana a medical professionals ti DPWH-Cordillera a maipasidong iti panagsanay para iti panagresponde iti medical emergencies ken agserbida a front liners kabayatan ti quarantine period dagiti empleyado ken job orders ti ahensia.
Bigbigbigen ti DPWH-Cordillera ti kinapateg dagiti empleyado daytoy iti agtultuloy a panagdur-as ti organisasyon ken ti pagilian isut gapuna a nasken a maipangruna met ti salun-at ken kinatalged dagitoy.
