BAGUIO CITY – Simmuko ti dua a rebelde a New People’s Army (NPA) gapu iti agtultuloy a nainget nga operasyon ti tropa ti gobyerno kontra iti komunista a rebelde sadiay Tadian ken Bauko, Mt. Province.
Inawat dagiti operatiba ti Police Regional Office Cordillera ken dagiti nagduduma nga unit ti Infantry Battalion ti Philippine Army dagiti dua a rebelde a kameng ti Kilusang Larangang Guerrilla (KLG) – Marco Command nga addaan operasyon sadiay Mt. Province.
Boluntaryo a simmuko sadiay Tabuk City, Kalinga ti rebel surrenderee a nabigbig iti alyas Joshua, 36-anyos ken residente ti Basao, Tinglayan, Kalinga ken insukona ti igamna nga M16 rifle ken magazine a naglaon ti 11 a bala.
Naamuan a pimmanaw ti sigud a rebelde iti komunista a grupoda idi pay 2016 gapu iti panagrigatna ken naglemmeg sadiay Barlig agingga a nagballigi ti panakinegosasyon ti gobyerno iti pamilyana a nagresulta iti panagsukona.
Simmuko met sadiay Bauko, Mt. Province ti rebel surrenderee a ni alyas Simon, 49-anyos a residente ti Bagnen Proper, Bauko, Mt. Province a miembro ti Militiang Bayan iti sidong ti KLG – Marco Command.
Gapu iti daytoy, inkari dagiti amin a panakabagi ti linteg iti rehiyon ti panangituloyda iti panakisarita kadagiti rebelde para iti panagsuko dagitoy.
